رثــــــــــــاء

قال تعالي ( وبشر الصابرين الذين اذا اصابتهم مصيبة قالوا انا لله وانا اليه راجعون) صدق الله العظيم
من اين أبدي رثائي هذا لقد ودعت قرية العريباب قبل السنين الماضية واحد من فلذات اكبادها الاوفياء والذي قدم روحه لخدمة السودان عامة وكان اخر المطاف في الولاية الشمالية.الا هو المرحوم أ/ عباس عبدالله الجزولي
وداعا يا من ذهب الي دار الاخرة
وداعا يا من بكته نساء العريباب عامة ونساء فريق الرفاعين خاصه
وداعا يا من عرفت كل الناس في اخر وداع
وفارقتنا وتركتنا حيري؟ في دنيا المهازل والهوان
فارقتنا وتركتنا في حالة ذهول وباقي الكلام
ليك طبعا يطول العهد مازال بينا يااغلي زول
الموت حق باقي ولكنك فراقتنا زي سرعة البرق الخفي
وافتك المنية وانت في عمر شبابك يافعا تاركا وراك احفادك واخوانك ونسال الله ان يجمعنا في جنات الخلود
فاقداك امنة ولسه تبكي من الفراق عايشة في ذهول
فاقداك امنه ولسة تحكي لمحاسنك تحكي وتقول
فاقداك امنه ولسه تشكي من الفراق ايه الحلول
فقداك امنه كنت لها زوج واخ وكنت للالام تزول
بكي اخوانك
وين تاني جيتك ليهم
لابتقول كلام في زول
ولاشفنه منك شينه
وماهماك دنيا وللاخرة تنصح فينا
وبيتك ديمه مفتوح وفراقك قفلته علينا
ياحليل عشم الرجال في الحارة بي سرعة بيجي
والجزولي واخوته بالحسرة بالدمعات نعوك ياحليل جيات الينا
ياحليل اخونا عباس الكان بيفقدنا وبيجينا.
ونسال الله ان ينزله منزل خير ويحسن مرقده ويغسله بالماء والثلج ويعطيه من حور الجينان ويسقيه من حوض الكوثر
مع الصديقين والشهداء.
ولنا عودة اخري انشاء الله

إن القلب ليحزن وإن العين لتدمع ولا نقول الا ما يرضي الله وإنا لفراقك يا عباس لمحزونون .. نعم لقد فقدنا أخا وصديقا وأبا .. نسأل الله أن يبدله دارا خيرا من داره وأهلا خيرا من أهله وعشيرة خيرا من عشيرته وزوجا خيرا من زوجه وأن يجعل قبره روضة من رياض الجنة وأن يسكنه فسيح جناته مع الصديقين والشهداء وحسن أولئك رفيقا.

ياسر ود عثمان