وطنان.............. ورب واحد

النخله

أعلي ميضنه

في الوطن

والنيل أدني فكرة إندهاش

مُجرد مبدأ عندك

إحتمابك إنتما

يا سنابل رجًعت

لون التأقمح للقمح

نشبت أضافرينا الخُدُر

في جتة الواطه الوديعه

الغير تربي

وتدي من احضانا بيت ،

ماليها شي ...

الواطه بالجد تفتخر

إنك مشيت

بي فوقا ضو

وباست خطاويك التراب

الشوارع لمَا جيتا ملان عبق ،

كادت توقِفلك معالم ذوقا صف

كادت تقلِّع توبا تنتظرك عروس

والعواميد لولا الكهارْب التعَّبت

كتفا الزهج من الوقوف ،

كان تنحنيلك في خشوع

كان دنقرتلك في شغف

والنيل

أكان ماعندو هم الضفه

والناس والمراكب والسمك ،

لو ما الصباح بيسقي الجروف

وإنتظرعند المغيب

يصبح مرايات للشمس ،

كان جفَف أمواجو وجرالك منتشي

لو ما الرِّهان البينو مابين الضفاف

إنو يديها الصدف

وتسيلو من قيزانا سد ،

كان بات معاك

ياسيدي لآحد العِشى

وشبعنا في موجك مشِي

يا مطمِّن الخوف باليقين

ساكنه فيك الإلفه

ساكن كل ِ شي

لازم يكون

بينك وبين النجمه سر

يا مُديّنه النور والبريق ،

يامُديِِِِِِّناك إنت أللألق ..

والقمر

يا ببقي ليك ،

يا اْديتو وصفة إنو كيف

يقدر يضوّي الليل براو

ويخلي بالو من الشوارع والشدر

ما الشوارع إمتداد

لي حكمه قالا أبوي

وكت جيت البلد :

إنو الأزقه خروج نفَس

والبيوت نفساَ طلع

حاميا القوانين الدخول

والعمارات إنتحال

لي صورة النخله القبيل

أول بِكِر ينكر

مخاض الطين وميلاد الفصول

يرفض شبابيك المسام

ويلحس ملح عرَق المطر

أداني بوي

فكرة نسويبك وطن

قبال ننفذ قولنا جد

جاتنا البيوت

شفقانه تحلمبك ضرا

محتاجه بس

لي كلمه منك

شان تقوم لا حيلا تاني وتنتصر

تنسج من أنفاسك حياه

تستوعب أفواج الغلابه الطيبين

من ذبذبات صوتك بحر

جنه ومداين للشعر

من ضو صباحاتك فجُر

يغمرنا دهشه وإنتعاش

صيوان تجمُّع للفرح

صدقه وكرامه وإنتشا

ومن ضل حروفك

لون محبه وإنسجام

نيل يذيد النيل براح

إلفه ومودَّه

وحله سكانا الغبش

إحترتَ فيك ..

مرات أقول إنك ملاك

جيت تجاملنا وتعيش بيناتنا زول ،

مرات أقول إنك بشر

إتخطي مرحلة البشر

قدَّم شهادة الخبره

شان يصبح مطر

وفعلاً بقيتلنا كل شي

إنسان مستَّ روعه ست

مفروض تكون

يا سيدي نيل

أصلو ما ممكن تكون إنسان فقط

مفروض يسوُوُبَك شمس

أو أُكسجين

يدي العصافير الأمل

يديها معني تطير بعييييد

لا بنادق لا كتل

ما القمري جنُّو جن الغني

وكتين يكون

واقفلو صياد في الدرب

والطير نموذج إلفه زيَّك

لا ضنين يا سيدي

لابعرف يغش

عندك مؤهل

إنو تبقي وطن جديد

أفضل من الوطن المجَهجَه ومُغترب

وعندك خيار إنك تكون

- أستغفر الله العظيم –

آخر نبي ...