غيب إحساس الرضى
ومسح الروح بالغباش
وانا مانعيت طيب معشرك
ولا أقمت عليك عزا
إشتهيت أفرد ضفيرتك للمطر
وأحقن وريدك بالدعاش
وأكتفيت
أفضل أريدك إندهاش
أو ألوذ بي نفسي عنك
يا مدهشة
أنا وين أفوت منك أمش
بشفق عليك من حسن ظنك
بالملائكة المارقه من باب الشمس
ياجابده من تحتي الأرض
وقابضه في نفسي العرش
يانابضه من عطش الجسد والروح
مجلوبه إنت ومستباحه
كل المواعيد الزنيمه
كانت مباحه
ومطلقه
كل البراحات الحميمه
موصوده دونك ومغلقه
مسجونه فيك إنتظارات السحاب
والإحتمالات المريحه ومقلقه
محلوبه من دمك عصارة العفه فيك
لافض فيك
ياصومعة إملاقي والعشق المحال
بتمرقي من وجع المحجه
وتندسي بين جرحي العضال
وما انبله حلقك بالإجابات السؤال
فعلام جدواه السؤال
علام جدواه السؤال
وفارسك مدجج بالدعاوي الخايبه
والوعد الحنوط
رددتي في سرك جلالات الهزيمة
وتليت على سري التشهد
والقنوت
مطموسه فيك كل المصابيح
الواقفه شاهد والبيوت
ومتعارضه مابين الضحك والعبره
شوكة حوت
فعلام جدواه السؤال
ياباحثه عن كل السواقط
من نهاراتنا المهمه
ونابته من خيبة أملنا
مع الليالي المدلهمه
يامتعبه
ومحقونه بي خدر الأماني
المستجمه
أنا مادلقتك للشوارع البارده
ولا البيوت المترفه
لو راودك عن نفسك الماجن الدعي
وهد عزمك بالوعود الزايفه
ما تنسي إنك كنت واقفه
علي المسامير الصقر
مجلية بي عرق الشفا
لاشاكيه من زل العوز
لاباكيه من وجع الحفا
وأنا مادلقتك للشوارع البارده
ولاالبيوت المترفه
يا واقفه مشروخه وأبيه
يا نحملك شرف القبيله
ونغرمك سيف القضيه
أو نبعثك حره ونبيه
لو قد ثوبك من قفا
وأنا مادلقتك .. مادلقتك