منتدى العريباب (مدني)

العريباب فى حدقات العيون
 
الرئيسيةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 أغاني تراثية ... في الحماسة و الشكر

اذهب الى الأسفل 
كاتب الموضوعرسالة
Tajuddin

avatar

المساهمات : 131
تاريخ التسجيل : 15/10/2008

مُساهمةموضوع: أغاني تراثية ... في الحماسة و الشكر   الخميس يوليو 30, 2009 2:16 pm

إخوتي و أصدقائي ...
السلام عليكم و رحمة الله و بركاته ..

دعوة لهذا التراث العريق الذي يمثل أصالتنا و تاريخنا من خلال هذه الإشعار الجميلة :


عــصار المفازه

شدّو لك ركب فوق مهرك الجمّاح
ضرغام الرجال الفارس الجحجاح
تمساح الدميرة الما بقتلوا سلاح
السُمّ النقوح في البدن نتاح
عصار المفازه للعيون كتاح
المال ما بهمّك إن كِتر و إن راح

*********
بطناً جابتك و الله ما بتندّم
يا أسـد الكداد في خلاك رذمّ
يا رعد الخــريف الفى سماك دمدّم
بابك ما نقفل نارك تجيب اللمّ
و ما بتعزم تقول غير أستريح حرّم

*********
أبواتك قبيل بحلوا للعوجات
مطمورتك تكيل للخاله و العمات
للجود و الكرم إيديك دوام بارزات
يا أب قلباً حديد فى الحوبه (الحاجة) ما بتنفات

********
عينيك يا الصقر فى الحارة ما بتنوم
صدرك للصعاب دائماً بعرف العوم
لا بتتـلام لا بتـعرف تجــيب اللوم
ود ناساً عزاز جمعـوا المكارم كوم





الفارس

شيّال الحمول(التقيل) دخرينا
الفارس أخوك يا الزينه

في الفنجري بجرّالنمّ
زول بضبح بقول حرّم
(زول بضبح بشبّع اللمّ)
ما بشيل حاشا ديّة دمّ
ما بسأل بقول بي كمّ

ود ناساً أصيلة قبيل
سوداني و بعدل الميل
مسّاح للدموعه تسيل
بِكرم ضيفه هجعة ليل

دهـ الجود(الكرم) المعاه بشاشة
دهـ العينة الغزيرة رشاشة
ما بميل للهوانات حاشة
كضاب أب جدود غشاشة

قمّحت الخصوم يا مك
يوم جابوا حديثهم ليك
دكيت لى حصونهم دكّ
و اشيلك النصر لا شك





cheers sunny sunny
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
mdtayeb

avatar

المساهمات : 291
تاريخ التسجيل : 13/09/2008

مُساهمةموضوع: رد: أغاني تراثية ... في الحماسة و الشكر   الخميس يوليو 30, 2009 7:07 pm

Tajuddin كتب:

عــصار المفازه


أبواتك قبيل بحلوا للعوجات
مطمورتك تكيل للخاله و العمات
للجود و الكرم إيديك دوام بارزات
يا أب قلباً حديد فى الحوبه (الحاجة) ما بتنفات





الفارس

شيّال الحمول(التقيل) دخرينا
الفارس أخوك يا الزينه

ود ناساً أصيلة قبيل
سوداني و بعدل الميل
مسّاح للدموعه تسيل
بِكرم ضيفه هجعة ليل






cheers sunny sunny




أبشر بالخير


يا ود عبيد الله
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Tajuddin

avatar

المساهمات : 131
تاريخ التسجيل : 15/10/2008

مُساهمةموضوع: سمح الشمايل   الأحد أغسطس 02, 2009 10:13 am

أبشر بالخير

منتظرين المزيد من ابداعاتك في هذا الخصوص ...
 

تسلم لي انت يا سمح الشمـــــــايل
في الرجال بنت الدخري الخزين

ماعونك خريف بيتك بدون أبواب
يا أب صدرا وسيع يامقصد الطلاب
معروف بالشهامة وللفقــر غلاب
وفي ساعة العدم وافر يمين جلاب

كل البقصدك مقضية حاجتو تمام
وفي الشينة بتقيف دايما ركاز قدام
تنتر يا الأســـد ثابت قوي وصدام
ومابترتالا روحك يالمن صغير هجام

في الشورة القبايل عاقدة فيك الرأي
كلمة الحق تقولا وما بتزح جاي جاي
بتمرق النصيحة حاشــاكا ما حاباي
ويا الفيك العشـــم حاضر يمين لباي





يتبع بإذن الله
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
mdtayeb

avatar

المساهمات : 291
تاريخ التسجيل : 13/09/2008

مُساهمةموضوع: رد: أغاني تراثية ... في الحماسة و الشكر   السبت أغسطس 15, 2009 11:30 pm


ما هو الفافنوس ما هو الغليد البوص
ود المك عريس خيلاً بجن عركوس
احي على سيفو البحد الروس

ما دايرالك الميتة ام رماداً شح
دايراك يوم لقا بي دميك تتوشح
دايراك يوم لقا بي نارو تتوشح
الميت مسولب والعجاج يكتح
احي على سيفو البسوي التح

إن وردن بجيك في اول الواردات
مرناً مو نشيط إن قبلن شاردات
أسد بيشة المكرمد قمزاتو مطابقات
وبرضع في ضاريع العنز الفارادات

كوفيتك الخو دم عصا بولاد
درعك في ام لهيب زي الشمس وقاد
سيفك من سقايتو استعجب الحداد
قارحك غير شكاي ما بقربو الشداد

يا بقة عبود السم
يا جرعة عبود السم
يا مقنع عزاز جعل العزاز من جم
الخيل عركسن ما قال عدادن كم
فرتاك حافلن ملاي سروجن دم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Tajuddin

avatar

المساهمات : 131
تاريخ التسجيل : 15/10/2008

مُساهمةموضوع: رد: أغاني تراثية ... في الحماسة و الشكر   الثلاثاء أغسطس 18, 2009 12:06 pm

حلوة و قوية ... يا ود عتمان ... إديك العافية و راحة البال ...

و نواصل .....


ياضي القبيلة

يا ضي القبيلة يا فارس الفُرّاس
تمساح الدميرة السواي وماك حدّاث
يا جبل الحديد يا الما بِشقك فاس
يا أسد البراري لعدوك قنّاص

يا الوارث الثبات حاشاك تقبّل فاز
إنت أخو البنات للعُقاب حرّاس
ديوان الضيوف كم وردوا فيك أجناس
يا القدحك بحر ما بكلموه الناس

عطاي السبيل من غير عِداد وحساب
تيجان الملوك الديمة مِنو تهاب
أجدادك شيوخ دارسين (حافظين) الكتاب
سموك الأصم يا خيرة الأنساب




الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
mdtayeb

avatar

المساهمات : 291
تاريخ التسجيل : 13/09/2008

مُساهمةموضوع: اسد الكداد الزام   الخميس أغسطس 20, 2009 9:24 pm

بتريد الطام للشاعرة رقية اخت ود حبوبة

وذلك فى محاكمة عبد القادر ود حبوبـة


بتريد اللطام اسد الكداد الزام
هزيت البلد من اليمن للشام
سيفك للفقر قلام
تيّم فى التقر انصارو منزربين
بالصفا واليقين حقيقة انصار دين
بالحرب ام طبائق قابلوا المسكين
فى وش المكن رقدوا التقول نايمين
تيّم فى التقرانصاروا زاربنوا
بعهدوا القبيل بعيسى تاهمنوا
اتلموا العمد ليهم نقر سنوا
الهوج والشرق طار المنام منوا
تيّم فى التقر قال العمير للسوم
القوى والضعيف من عينو طار النوم
الكفرة النجوس ما بختوا من اللوم
حجرت الدرب خليت جمالم تحوم
الاسد النتر وقال الدين منصور
لمولوا الاورط جابوهم بالبابور
العمد الكبار كلامهم بقى مدحور
كم فقشت مدير وكرمت بالمامور
الاسد النتر بى جيهة الابقار
لمولو الاورط شايلين سلاح النار
ود حبوبة قام ورتب الانصار
فى كتفية ديك كم شبعن صقار
الاعلان صدر واتلمت المخلوق
بى عينى بشوف اب رسوة طامح فوق
كان جات بالمراد واليمين مطلوق
ما كان بنشنق ود اب كريق فى السوق
بتكلم بقول بوريك مين حسبوا
نايبو السنين منّو الرجال حسبو
الاعلان صدر واتلمت الحلال
نصبولو السلاح واتكرنف الخيال
قدر الله الحصل و الزمان ميال
منسول من ابوك ماك ود حرام دجال
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ود القطينة



المساهمات : 37
تاريخ التسجيل : 12/03/2009

مُساهمةموضوع: كيف ننهض بفنونا الشعبية   الأحد أكتوبر 25, 2009 9:36 am

هذا سؤال ينبغي أن يوجه أولا الي الباحثين في هذا اللون الشعبي عندنا في السودان،لأن هذا الفن يعد من الفنون الحديثة، ليس في السودان فحسب بل في معظم الدول النامية. أن مسئولية الباحثين في الفنون الشعبية يجب أن تتركز في الناحية الدعائية لهذا الفن، حتي ينتقل من التلقائية الي المنهج العلمي التجريبي الحديث، فنستفيد من تجارب الذين سبقونا في هذا الضمار، أن فكرة النهوض بالفنون الشعبية لا تزال الي الآن عبارة عن مجهودات فردية يقوم بها بعض المتخصصين والهواء، لا تجمعهم رابطة، أو مركز علمي يقوم بتنظيم هذه المجهودات الفردية، ويبرزها في طابع قومي منسق.



وشكور على هذا الطرح الجميل
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Tajuddin

avatar

المساهمات : 131
تاريخ التسجيل : 15/10/2008

مُساهمةموضوع: رد: أغاني تراثية ... في الحماسة و الشكر   الإثنين يونيو 07, 2010 2:08 pm

أخ ود القطينة ... لك التحية .. أتفق معك فيما ذكرت ... ولكن هنا قصدنا .. الإستمتاع والترويح بهذا التراث العريق ليس إلا .. وذلك بجمع أكبر عدد من القصائد منه ...

ولك نواضر مودتي ..




بدخل فى المحاص

بدخل فى المحاص أب جله بتفور قاهر
صمد البجن طابور
****
شدّولو فوق تاتاي
مطلوق الجبين اللّي عرضو مو نساي
عجل مشن أب قرون للساهله مو رعاي
لسع صغير وكتين يسوى كيفن الراي
****
أرباب الفراسه الوسمو فوق ناظرو
والعوقه أب صفوف انت بتجى بتناظرو
ود فايد حسن ما بتقدرو تناظرو
والخوف حين قسموه أخوي ما حاضرو
****
يا شقّاق عتامير الخلا والصو
يا أب قلبا شجيع صوانو واقف كو
أشعت فى القتال ليهو العرض والهو
فى كباد الرجال شبع صقور الجو
****
الليله العيال اتسامرو البارود
جاك يا من كان على صف الحرابه يقود
ود فايد حسن الفارس المأسود
كوفيتو أم عبل وسط المحامص بتخوض
****
عاجبني العيال الكلهم نجاح
جاك يا من كان يجيك فوق العبار مو شاح
ود فايد حسن الفارس اللّفاح
إتبسم لقاهن بين الحجل والراح
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
أغاني تراثية ... في الحماسة و الشكر
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى العريباب (مدني) :: القسم العام :: المنتدي الثقافي :: منتدى الاغانى-
انتقل الى: