إهـــــــــــــداء
إلى منتخب (الحله) الصاعد للدرجة الثالثه ..
عروس الحله
إسمِك فوق سما العالم نكِتْبُو نخُطُّو
رسمِك في الفؤاد واجب علينا نختُّو
الخاوانا ، ليو حبل الآخوه نمِطُّو
والعادانا من حصة رَحِمْتُو نفطُّو
بعد ما قالو في درب المدائن طشُّو
"عريب الياب " عُقبْ فتحو المداخل وخشُّو
(تيمو) المنتصر فقَّس مرَق من عُشُّو
جاب لينا الفرح بي فضل (الحلاوي) و(تشو)
وبعد ما قالو شاخت ، حلَّت مواعيد مُوته
بي جهد الشباب الحله علَّت صوته
أولاد السرور الما بِجلُّو الشُوته
عزيتو البلد .. رجعتو تاني الجُوطه
من كل بيت اتجمعو الفرسانْ
اتوحدنا جت .. لا شايقي لا بطحانْ
همنا ننتصر نصبح جميع أُخوان
يترهب العدو وكتين نجي الميدان
تشكيلة الفريق ما فيها قَطْ من عِلَّه
فوق ليل البلد أولادنا كانو أهلَّه
صفينا النفوس وإيدينا ليك يا الله
تحفظ لي (عمر) حارس عرين الحِله
وشاحدك يا كريم الحله يكبر كُومَه
العارض يمش ، يخَطَى ويودع شُومه
صمام الأ مان (ود عيسى) المنَع للحومه
تستاهل تحيه .. ومني ليك القومه
مساكنا الشمال (عمر) التروسك تَجْ
وقَّفت الخصم .. ضيَّقْ عليهو الفَجْ
قطاع الطريق الكاسر رُقابُن كَجْ
ود نور الله قفَّال المنافذ (كَجْ)
النُص المُكرَّب .. صامد ومانع سدُّو
كم دَعم الهجوم (طارقَ) الْ موصِّلو حدُّو
ومهما قالو فيك … الشُعراء شالو ودُّو
ماقَدرك شُكُر … قَدرك كبير يا (ودُّو)
وما بتوصَّف الجدَعْ المُدافعين غادي
غزال الحله … الحِمِش الرزين الهادي
يبراهو الشكر كان جايي أو كان غادي
البطل الهُمام (صديق محمد هادي)
يبيِّض وشَكُن يا البيَضتو لينا الوَشْ
(عمار) بي هدف فَشَّ الغباين فَشْ
الجاب النصُر وتشتش قلوبُن تَشْ
أب قدماً شمال .. تسلم كتير يا (تَشْ)
العِقد الفريد الديمه رافع رأسنا
أولادنا التِلود في الحاره ياهُم ناسنا
في درب الكَفَر ، كضَب البقول يوم داسنا
بنجيب النصُر ولابدَّ نرفع كاسنا
12/12/2011م
موضوع: عروس الحله 
الثلاثاء ديسمبر 20, 2011 11:43 pm