منتدى العريباب (مدني)

العريباب فى حدقات العيون
 
الرئيسيةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 خرفان في الصيوان!!!

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
aabersabeel



المساهمات : 36
تاريخ التسجيل : 06/06/2011
الموقع : طافش في بلاد الله الواسعة

مُساهمةموضوع: خرفان في الصيوان!!!    الثلاثاء أكتوبر 18, 2011 1:19 pm

خرفان في الصيوان!!!
--------------------------------------------------------------------------------
منذ الآن وعلى مرمي 3 أسابيع من العيد تفشت حمى الوادي المتصدع بين الناس تحت وطأة اشتعال أسعار الضحية.. عشان كدا قمنا أمس بدري بدري ختفنا رجلنا نزلنا شبرة (سوق) الغنم ، قلنا نشوف لينا عضة للضحية؛ أي حاجة إن شاء زول. ففوجئنا بلمة وهيصة سادة عين الشمش. شنو آآآآناس قالو الخرفان السنة معلنة حداد عام.. ضاربة سرادق عام لتلقي واجب العزاء في بعضها البعض. قال اتعهدو مع مقاول فرشات يزودهم بعدد من الصيوانات مع الأباريق و شحنة مناديل فاين لزوم المخاخيت و حاجات تانية متل سكاكين لشق الجيوب و وبراطيش للطم الخدود. فعلاًََ شفنا عجباً عجاباً. أول شيء أهل البكا ظاتم خشم بيوت: أجناس وأحجام و أشكال وألوان. بدءاً بال (vip), البيجي الأنيق ستايل من النوع المفكر يدخل (سجل جينص) للأرقام القياسية.(ضحية ناس جمال الوالي ولا فوق).. وهبوطاً إلى الأبرق البروليتاريا الهفتان بعيد من النوع عنك البحرجك مع نسابتك. زي واحد بجغور صومالي كدا منزوع الضنب ما يساوى خمسة قروش سمع سيدو يفاصل و يتمنى منى في سعره قام اتنحنح نحنيحة خبيثة كدا، كناية عن قوله:" بيع يا منافق ليك الحق في كل ما تنافق" أنت عارف عندي أنيميا( وكمان مثقف بتابع عزيزي المشاهد على القناة القومية). كذلك رأينا منها المصاب بحمى ما قبل الضبح، وآخر يقرأ بهستيريا في كتاب (كيف تصبح حيوان آخر- لأسامة السيد). لاحظنا بعضها عدواني جداً وشكلو مهووس بالسياسة شبه الكلب شارون (مرمي معفن ليه 6سنين كل يوم يقطعوا حتة من مرارتو- يستاهل دا حق جماعة صبرا و شاتيلا). لكن في المقابل بعضها مسالم تلقاه حايم بالكوش (يقرض) الدلاقين، بينما آخر رومانسي ( يقرض) الشعر وهو يندب حظه: عيد بأية حال عدت ياعيد لنتشوي ثم نتلهط أم لأمر فيك تجديد؟؟؟ أو يغني: ( عدت ياعيدي بدون طقوس .. وين بقرنا وين التيوس .. غابو عني) أثناء مرورنا ضحكنا خروف فشنك لقيناه واقف لسيدو ينفخ فيه بطرمبة كل شوية, وآخر ألعن يتفاوض مع واحد يدقس ليه في دحيش يشرح ليه إزاي يلبس الفروة في يوم العيد والأجرة 3 كلاليق برسيم، يستلم بعد أيام التشريق. ثم آخر تفتيحة راح فاتح بلاغ في صاحبة ملفق لو تهمة الشروع في القتل العمد مع سبق الصرار والترصد. وواحد تاني كما دا مافيا سحب السكين من سيدو وجرسو بيها. و ثالث وصلت بيه حالة الاكتئاب أنو قعد يدعي على نفسه بأنفلوانزا الخنازير ولا أي نصيبة تاخدو بس تختيه الساطور. ورابع شهادةعربية حنكوشة حنين كدا لجأ للدبلوماسية فتوسل لصاحبه، يقول ليه: هانت عليك كالعشرة. الحقيقة في شلة خرفان كدا معرفة قديمة من سنين طويلة لاحظلنا غيابهن فقدناهن قالو: مشن يعملن حفلة تنكرية مع طيور البطريرق(قال ليك ضاربات الهم بالفرح) و بعضها كمان للغرابة سمعناه يتبادل عبارات الشماتة .
ــــــــــــــــــــــــــــــــــــــــــــــــــ ـــــ ــــــــــــ
أخوياً لينا شاف ليه خريفات كدي زي المهجنة ولا محورةة وراثياً مش عارف فأتحفنا بتعليق ظريف قال: اسمعني وأنا أخوك: حاجة من الاتنين:_
هدولا يا إما جمال الله سخطهم
ولا سخلات الله راضي عنهم
و ديل بشتروهم مشاركة ولا كيف .. عجايب ،موباااالغة
ــــــــــــــــــــــــــــــــــــــــ
فعلقت على تعليقه بهذه من عندي:
لا وأنت السادق يأ اللخو, حاجة من اتنين:
ديل يا إما خرفان منملة
و لا نملات مخرفة,,,
و ممكن تشتريهم يا أما( مسيار) أو (عرفي)!!! ودي بصراحة مش عجايب ,الضحية بقت رابعة المستحيلات إلى جوار لناس الغول والرخ والخل الوفي...
أنا نصيحتي تفتحو للموضوع من أساسه وتكسبو (الفجر وليال عشر) أحسن و بعدين تتموها شربوت بضلافين.
مع مودتي الشديدة
تثبيتة:-
للأمانة شكر خاس للرائع معروف أوشي على الصور التي أوحت لي بها الخرابيط المرتجلة, وما تخاف اللخو حق الملكية الفكرية ففتي ففتي نصو ح يكب في جزلانك, بقول أحسن ليك من شغلة الرشايدة دي.... ولا شنو؟
؟؟
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
خرفان في الصيوان!!!
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى العريباب (مدني) :: القسم العام :: منتدى الطرف والنوادر-
انتقل الى: