رد قاسي علي احد ابناء ام درمان

جنا أمدرمان أبقا شوية شادي الحيل وشيل من إيدك الليونة سن الفيل شن تعرف بلا التجميل
خليهو الدلال للريل تعال فد مرة زورنا هناك عشان تعرف حضارة النيل
ناسا بالطواري قسم يجسرو السيل
تعال شوف السواقي النايحة طول الليل
والتور البسوق أرقوقو تب مو فاضي في العنتيل
يملى عيون جداولنا ودموع تسيل
ووكت الحارة تتودر وتسمع لي سيوفة صليل
وتتبل الركاب بالدم أنين الخيل يعقبو صهيل
تغني مهيرة فوق الخيل جنانا بتلقا يملى العين يذيد الكيل ويسقي عدونا من تلاخنا نار الويل
وأصلو الخوف يمين مو هيلنا والأعوج نقولو عديل
وذي النملة بصغر في عيونا الفيل
ولاد ترهاقا نحنا هناك تراثنا أصيل
وأهل بركاوي تم جريدو فادعو الشيل
وأهل المنقة والمشرق مروس بالصفوف قنديل
أكلنا قمح كلامنا سمح ويانا أهل حضارة النيل
بناتنا يمين نعومة حرير عويدن بان حلاوتو إكسير
وسمحات هن بلا منكير حلات إيدن مع حبل الدلو الفي البير
حليل الطابية يا أمدرمان حليل كرري وحليل أبو عنجة يا حمدان
حليل المهدي وأسلافو اللكانو ذمان
جناك الليلة يا أمدرمان بيتكسر بلا السيسان
ويتمايع يميل في رقيصو متل البان
مضايق أختو يا أخوان في لبسا وحلاوة لبان
والضفر المربي كمان وآخر صرخة
تعال تعال شوف الغبش في هوان لا عرفو المكايج ضما لا في دهان
والطافية فوق الراس وبارمين عمة الدبلان
وعند الضيف أمان يا جني أماني حنان
جنا أمدرمان وليد أب عاج شيل من إيدك الليونة سن العاج شن تعرف بلا المكياج
حصل يا وليد نزل في النيل عايم قفاك أوباج
وشلت الكاس طمستبو في دالتا غريقي وضمة مو رهراق
حصل يا وليد نزل في ضهرك الكرباج وجربت القرض تتداوى ذي ما نحن لينا علاج
حصل يا وليد جربت اللباس الجاري التكة الملاني عجاج
حصل يا وليد أكلت الكسرة من الصاج
حصل يا وليييد
ما بتعرف بلا المكياج وأكلك طازة من الطوة بي كبدة وحمام ودجاج
شين داير تقول يا جني وما بتعرف بلا أكل الطوسطة بالبامبي والباسكوتة والباسطة أم عجينا ني
بتعرف ترقص الجامايكي يا أبشعرا مبرم طي
وهووي يا وليد
جنا أمدرمان مطير جنو حاول يستفذ سامعنو
أصلو الحيل هو ما شادنو في أي الكلام لاونو
لو شفتو الإضيني أظنو مو عارف حضارتي أظنو
الذرة والمريق ذارعنو الجدول نمرتق منو السيف والدرق راكذنو للغارة الحصان ساعنو والأسد البغير في الغابة نافش ريشو شافعنا البيرضع دابو يقلع سنو
أخير يا أخوي لا تفلع وبيتكم من قزاز باننو