همــــــــــومي

مهما ضاقت بى همومى وجافت الفكر السديد واستقبل المطر الحراز وانتفت نعمة المال والبنين
واستوطن الوجع السبيط واتوهدب الصبر الجميل وانكتم فى جوف الرباب وترا حزين واتبكم الناى الحنين
حتى النمل هاجر رحل ساب البلد طلب الاغتراب لما عزت ترمة العيش طرق الرهيف المروية بعرق الجبين
وحرد المريق مطر البخات وموية التساب ريق الترع عرق السحاب وابل السماء ضلا رمى بعد محل السنين
وجافة المنام طرف الرضيع واستعمر الخوف الجريد وسد الرحم بابو وشمعواوسمكرواقفلوا فى وش الجنين
انكسر خاطر القصيد وانكفت الامال كئيبة وموجعة بضيم السؤال مسودة دائما مرهقة فى عصب زولا ضنين
وفارق النيل مسارو وسكتو اتقطع برك حرد المسير وضلت اجنحة النحل درب الازاهر والرحيق عشق الطنين
واتوقفت ابل الرحيل عز النشوق داب السفر عن الرحيل وفارق الرمل السراب وباحت القمر لابو الدردوق بسرا دفين
الا شافعة دابة يافعة حلوة طاعمة شا يفة من خلف الغيوم القناديل المضيئة والفراشات الانيقة والورودالفاتقة حين
لمة احباب فى جبنة بى بخورا قاجى فى عز الهمبريب مقيل ناسا عزازوحنان صبحية تحت لبخا ضليلو رهين
حجا الحبوبة عن الهنباتة والرباطة والشاطر وياام احمد دقى المحلب فى توب احمد للبلال والحنة وغنا الزينين
ولمة شفع الحلة فى مغيب العصا رى يتهامسو بين الحوارى يتغنو ديرا ديرا يامطيرة صبى الليلة ولعب الطين
واما تهدهد فى وليدا يتثاءب يغا لبو ا نعاس النوم النوم بكريك بالدوم والانناس ويتناوم ويتمرجح كما وزين
ودلوكة ولمة نا س وصقرية نغيم شاشاى تجر النم ام حقين تجرتق فى وليدا الزين تجيب مسدار بعد دورين
ونا سا يسرو العين يعجبوها ويملوها تمامة كيف مساديرم عوافى كيف حالكم سلام جاكم نعل طيبين
فى شان السمحة تتبختر وتتمايل تعدل توبا للشبال عشان الفال جبر خاطر حلم باكر وودعات تكف العين