]هذه الحادثة حصلت بأحد ضواحي كردفان الغرة التي تشتهر بالخير بره وجوه فكانت هي مأساة طفلة بريئـــــة يتيمه رماه والده السديد العقل الذي تلاعب بها الشيطان وقاده الي ان يرمي البنت الصغيرة البريئة في بئر مهجورة من زمن بعيد بسبب ضياع واحده من اغنامه وكان قاسي عليها في الخيارات اليكم النص ثم التعليق .................................يازول يازول أقيف أسمع هوايل
قصه حاصله .... لى أم شوايل
شوف أبوها أبوها.. الحالو مايل
عقلو عقل الضاع وسط شرب الفتايل
البت يتيمة ومرت أبواها مرت قوايل
وأم شوايل راعية معزة ما فيها شايل
ودّرت والدنيا عيد ..عيد والعيد قبايل
معزة أو إتنين تلاته .. من من القلايل
تكلمت بكل صدق للحقيقة بدون رسائل
ضاعت المعزه وبفتش ليها فى كل القبايل
*********************
بس أبوها القاسى قلبو فارقت للحكمه دربو
أداها أسوأ من خيار الموت عديل ما خافو ربو
وفى العدم البير هناك هناك وبالشوك يزربو
أختارت البير البير لو يغير قاسى قاسى قلبو
شيطانو كان شيطان كبير سايق سايق لسربو
وساقه ليل والوقفه عيد وإبليس إبليس غدربو
ورماها رماها زى رمية كلب وزادو ضربو
**********************
والبير هى بير مهجورة من نشل الدلو
مسكونه بالجان والثعابين ..وأم دلدلو
ونزلت هناك والحال هناك ما كان حلو
وحشة زى وحشة قبور بالله مره أتاملو
لو كان لقيت.. نفسك فى ليل من أولو
ومرت أيام والاسابيع والصوت يجييك ما تنزلو؟؟
أنا أم شوايل مانى جان مانى جان بس هللو
ونزل (الكمس ) فارساً فارساً شجاع مابدلو
ما خاف من المسكون وجان أو من دبيب قال نزّلو
وشاف هوايل وشاف دبايب والعقارب جلجلو
ونادى لى صحبو المعاهو الحال صعب بس أصبرو
**************************
ورفع أم شوايل من رقاده رقاده الكان طوييييل
بى قدرة المولى الكريم..الكريم وبلا بلا عويل
هى الصابرة أكتر من .. من شهر على القليل
كورة لبن من رب رحيم ... رحيم ليها الدليل
وأم شوايل عايشه بينا وتقرأ فى ضل الاصيل
وأم شوايل عايشه بينا وتقرأ فى ضل الاصيل
. مأساة الطفلة ام شوايل بشمال كردفان
موضوع: القصيدة التي ابكت كل من قراءها 
الخميس يونيو 03, 2010 8:32 am
